देवाचा देव

क्रिकेट हा धर्म मानल्या जाणाऱ्या भारतात सचिन तेंडूलकरला भारतीय क्रिकेटचा देव मानण्यात येतो. मात्र या देवाचादेखील देव आहे आणि ते म्हणजे द्रोणाचार्य रमाकांत आचरेकर सर. एखादे शिल्प साकारायचे असल्यास शिल्पकाराकडे दगडाची पारख करण्याची अचूक क्षमता असावी लागते. आचरेकरांकडे ही क्षमता निश्चितच आहे आणि म्हणूनच सचिन तेंडूलकर, विनोद कांबळी, प्रवीण अमरे, अजित आगरकर यांसारखी अजरामर क्रिकेटशिल्पे तयार झाली. क्रिकेटचे सगळे नियम मोडून काढत आचरेकर सरांनी आपल्या विद्यार्थ्यांना मनमुराद क्रिकेट खेळण्याचे स्वातंत्र्य दिले. त्यांनी कोणत्याही खेळाडूचा नैसर्गिक खेळ आणि शैली बदलण्याचा प्रयत्न केला नाही. खेळाडूंची पारख करण्यासोबतच त्यांना प्रशिक्षण देण्याची स्वतंत्र योजना होती. त्यासाठी ते स्वतः फार मेहनत करायचे. कोणत्या खेळाडूवर किती मेहनत घ्यायची, हेदेखील त्यांना बरोबर कळायचे. नेट प्रॅक्टीससोबत त्यांनी प्रत्यक्ष सामन्यांनादेखील तेवढेच महत्व दिले. सामन्यादरम्यान खेळाडू परिपूर्ण होत असतो; त्याची गुणवत्ता, क्षमता सामन्याच्या वेळी खऱ्या अर्थाने दिसून येते, असा त्यांचा विश्वास होता. आजही शिष्यांच्या यशामुळे ते आनंदित होतात. आपले विद्यार्थी रणजी सामने खेळले, कसोटी सामने खेळले यांचा आनंद त्यांना एखाद्या पुरस्कारापेक्षाही अधिक होतो. आपल्या एखाद्या शिष्याला पुरस्कार मिळाला की, आचरेकर सरांची कळी खऱ्या अर्थाने खुलते. स्वतःला मिळालेले अनेक पुरस्कार त्यांना त्या पुरस्काराच्या तुलनेत नगण्यच वाटतात. अशा या शिष्यप्रिय प्रशिक्षकाला भेटण्याचा आणि त्यांच्याशी मनमुराद गप्पा मारण्याचा योग २०१३ साली 'द ग्लोबल टाईम्स' या वृत्तपत्रात कार्यरत असताना मला आणि माझ्या सहकाऱ्यांना आला होता. त्यांच्याशी मारलेल्या या गप्पा....